ନୂଆଦିଲ୍ଲୀ: ଉପରାଷ୍ଟ୍ରପତି ଜଗଦୀପ ଧନଖଡ଼ଙ୍କ ହଠାତ୍ ଇସ୍ତଫା ପରେ ସାରା ଦେଶରେ ଚର୍ଚ୍ଚା ଜୋର ଧରିଛି। ଶ୍ରୀ ଧନଖଡ଼ କାହିଁକି ଏତେ ବଡ଼ ନିଷ୍ପତ୍ତି ନେଲେ ସେନେଇ ଅନେକ ପ୍ରଶ୍ନବାଚୀ ସୃଷ୍ଟି ହେଉଥିବାବେଳେ ଏହାରି ମଧ୍ୟରେ ତାଙ୍କ ସୁରକ୍ଷା ଗାଡ଼ି କୁ ନେଇ ଏକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି।
ଗତ ଫେବୃଆରୀରେ ଧନଖଡ଼ଙ୍କ କାର୍ଯ୍ୟାଳୟ ଗୃହ ମନ୍ତ୍ରଣାଳୟକୁ ଏକ ଅଜଣା ଅନୁରୋଧ କରିଥିଲେ। ତାଙ୍କ ସୁରକ୍ଷା ପାଇଁ ଥିବା ବୁଲେଟପ୍ରୁଫ ବିଏମଡବ୍ଲ୍ୟୁ ଗାଡ଼ିଗୁଡ଼ିକ ଏବେ ବହୁତ ପୁରୁଣା ହୋଇଯାଇଥିବାବେଳେ ସେଥିମଧ୍ୟରୁ ଦୁଇଟି ଛଅ ବର୍ଷରୁ ଅଧିକ ପୁରୁଣା। ତୃତୀୟଟି ମଧ୍ୟ ପାଞ୍ଚ ବର୍ଷ ପୂରଣ କରିବାକୁ ଯାଉଛି। ନୂଆ ବୁଲେଟପ୍ରୁଫ ଗାଡ଼ି ଆବଶ୍ୟକ। ଏହି ଅନୁରୋଧ ଦିଲ୍ଲୀ ପୁଲିସର ସୁରକ୍ଷା ବିଭାଗକୁ ମଧ୍ୟ ପଠାଯାଇଥିଲା। କିନ୍ତୁ ଗାଡ଼ି କିଣା ଗୃହ ମନ୍ତ୍ରଣାଳୟର କାମ ବୋଲି ସେମାନେ ସ୍ପଷ୍ଟ କହିଥିଲେ।
ଜୁନ୍ରେ ଗୃହ ମନ୍ତ୍ରଣାଳୟ ଜଣାଇଥିଲେ, ଏକ ବିଶେଷଜ୍ଞ ଟିମ୍ ଗଠନ ହେବ। ଏଥିରେ ଏନଏସଜି ଓ ସିଆରପିଏଫ୍ ଅଧିକାରୀ ରହିବେ। କିନ୍ତୁ ନଭେମ୍ବର ୨୦୨୪ ପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଗଲା ନାହିଁ।
ଏହି ବିଳମ୍ବକୁ ଦେଖି ଉପରାଷ୍ଟ୍ରପତିଙ୍କ କାର୍ଯ୍ୟାଳୟ ଏକ ବଡ଼ ନିଷ୍ପତ୍ତି ନେଇଥିଲା। ସେମାନେ ବୁଲେଟପ୍ରୁଫ ଗାଡ଼ି ନାହିଁ ତ ନନ୍-ବୁଲେଟପ୍ରୁଫ ଇନୋଭା ଗାଡ଼ି ମାଗିଥିଲେ। ତା’ପରେ ଧନଖଡ଼ ସାଧାରଣ ଇନୋଭାରେ ଯାତାୟାତ କରୁଥିଲେ। ଦିଲ୍ଲୀ ପୁଲିସର ଆଭ୍ୟନ୍ତରୀଣ ରିପୋର୍ଟ କହୁଛି, ପୁରୁଣା ବୁଲେଟପ୍ରୁଫ ଗାଡ଼ିଗୁଡ଼ିକ ପାଞ୍ଚ ବର୍ଷ ପୂରଣ ହେବାରୁ ବଦଳାଯାଇଥିଲା। ନୂଆ ଗାଡ଼ି ଭାବେ ଇନୋଭା ଓ ଫର୍ଚ୍ୟୁନର ଦିଆଯାଇଛି। କିନ୍ତୁ ଏଗୁଡ଼ିକ ବୁଲେଟପ୍ରୁଫ ନୁହେଁ। ଦିଲ୍ଲୀ ପୁଲିସ ବୁଲେଟପ୍ରୁଫ ଗାଡ଼ି ଦେବାକୁ ପ୍ରସ୍ତାବ ଦେଇଥିଲେ। କିନ୍ତୁ ତାହା ପ୍ରତ୍ୟାଖ୍ୟାନ ହୋଇଥିଲା।
ଦେଶର ଦ୍ୱିତୀୟ ସର୍ବୋଚ୍ଚ ପଦରେ ଥିବା ବ୍ୟକ୍ତିଙ୍କ ସୁରକ୍ଷା ଗୁରୁତ୍ୱପୂର୍ଣ୍ଣ। ତଥାପି ବୁଲେଟପ୍ରୁଫ ଗାଡ଼ି ବଦଳରେ ସାଧାରଣ ଇନୋଭା ମିଳିବା ଆଶ୍ଚର୍ଯ୍ୟଜନକ। ଏହା କ’ଣ ସୁରକ୍ଷାରେ ତ୍ରୁଟି ନା କାଗଜପତ୍ରର ଧୀମା ଗତି? ଧନଖଡ଼ଙ୍କ ଇସ୍ତଫା ଏହାକୁ ଆହୁରି ରୋଚକ କରିଛି।
କୁହାଯାଉଛି, ଧନଖଡ଼ଙ୍କର ବିଜେପିର ଶୀର୍ଷ ନେତୃତ୍ୱ ସହ ଦୂରତ୍ୱ ବଢ଼ିଥିଲା। ଏସବୁ ମଧ୍ୟରେ ସୁରକ୍ଷା ଗାଡ଼ି ବିବାଦ ନୂଆ ମୋଡ଼ ଆଣିଛି। ଏହାର ସତ୍ୟାସତ୍ୟକୁ ନେଇ ଚର୍ଚ୍ଚା ଜୋର୍ ଧରିଛି।
