ସବୁଠୁ ଓଜନଦାର ସାଟେଲାଇଟ୍‌ ଲଞ୍ଚ୍‌ କରି ଇତିହାସ ରଚିବ ଇସ୍ରୋ

ଶ୍ରୀହରିକୋଟା: ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ) ଆସନ୍ତା ରବିବାର ଆନ୍ଧ୍ରପ୍ରଦେଶର ଶ୍ରୀହରିକୋଟାସ୍ଥିତ ସତୀଶ ଧାୱନ୍‌ ମହାକାଶ କେନ୍ଦ୍ରରୁ ଦେଶର ସବୁଠୁ ଓଜନଦାର ସଂଯୋଗ ଉପଗ୍ରହ ସିଏମ୍‌ଏସ୍‌-୦୩ (CMS-03) କୁ କକ୍ଷପଥକୁ ପଠାଇବାକୁ ପ୍ରସ୍ତୁତ।୪,୪୧୦ କିଲୋଗ୍ରାମ ଓଜନର ଏହି ଉପଗ୍ରହ ଭାରତରୁ ଏପର୍ଯ୍ୟନ୍ତ ଲଞ୍ଚ୍‌ ହୋଇଥିବା ସମସ୍ତ ଉପଗ୍ରହ ମଧ୍ୟରୁ ସବୁଠୁ ଭାରୀ ହେବ। ଏହାକୁ ଏକ ଭୂ-ସମକାଳିକ ସ୍ଥାନାନ୍ତର କକ୍ଷ (GTO) ରେ ସ୍ଥାପିତ କରାଯିବ ବୋଲି ଇସ୍ରୋ ପକ୍ଷରୁ ଜଣାଯାଇଛି।ଏହି ମିଶନ ପାଇଁ ଇସ୍ରୋ ବ୍ୟବହାର କରିବାକୁ ଯାଉଛି ତାଙ୍କର ସବୁଠୁ ଶକ୍ତିଶାଳୀ ରକେଟ ଏଲ୍‌ଭିଏମ୍‌-୩ ଏମ୍‌-୫ (LVM3-M5), ଯାହାକୁ “ବାହୁବଳୀ ରକେଟ” ବୋଲି ମଧ୍ୟ ଜଣାଯାଏ। ୪୩.୫ ମିଟର ଉଚ୍ଚର ଏହି ରକେଟର ସମ୍ପୂର୍ଣ୍ଣ ଆସେମ୍ବଲି କାର୍ଯ୍ୟ ଶେଷ ହୋଇସାରିଛି ଏବଂ ସାଟେଲାଇଟ୍‌ ସହ ସଫଳତାର ସହିତ ସଂଯୋଗ କରାଯାଇଛି।ଲଞ୍ଚ୍‌ ପୂର୍ବରୁ ଏହି ରକେଟକୁ ଦ୍ୱିତୀୟ ଲଞ୍ଚ୍‌ ପ୍ୟାଡ୍‌କୁ ନେଇ ଅନ୍ତିମ ପ୍ରସ୍ତୁତି କରାଯିବ ବୋଲି ବେଙ୍ଗାଲୁରୁସ୍ଥିତ ସ୍ପେସ୍‌ ଏଜେନ୍ସି ଜଣାଇଛି।