ନୂଆଦିଲ୍ଲୀ: କଂଗ୍ରେସ ନେତା କହିଥିଲେ ଯେ ପ୍ରତ୍ୟେକ ନିର୍ବାଚନରେ ଭୋଟରଙ୍କ ନାମ ଡିଲିଟ୍ କରାଯାଏ। କର୍ଣ୍ଣାଟକର ଆଲନ୍ଦରେ ମଧ୍ୟ ୬,୦୧୮ ଭୋଟ ଡିଲିଟ୍ କରାଯାଇଥିଲା। ଯାହାର ପ୍ରମାଣ କଂଗ୍ରେସ ପାଖେ ଅଛି ବୋଲି ଭୋଟର ତାଲିକାରେ ଅନିୟମିତତା ନେଇ କଂଗ୍ରେସ ନେତା ରାହୁଲ ଗାନ୍ଧୀ ମୁଖ୍ୟ ନିର୍ବାଚନ କମିଶନରଙ୍କୁ ପୁଣି ଟାର୍ଗେଟ କରିଛନ୍ତି। ରାହୁଲ କହିଛନ୍ତି, “ମୁଁ ମୋ ଦେଶକୁ ଭଲ ପାଏ। ନିର୍ବାଚନ ସମୟରେ କଂଗ୍ରେସ ଭୋଟ ଜାଣିଶୁଣି ଡିଲିଟ୍ କରାଯାଇଥିଲା। ସଫ୍ଟୱେର୍ ବ୍ୟବହାର କରି ପ୍ରକ୍ରିୟାକୁ ହାଇଜାକ୍ କରି ଭୋଟରଙ୍କ ନାମ ଡିଲିଟ୍ କରାଯାଇଥିଲା। ଏପରିକି ୧୪ ମିନିଟରେ ୧୨ ଭୋଟ ଡିଲିଟ୍ କରାଯାଇଥିଲା। ଏଠାରୁ ସ୍ପଷ୍ଟ ଜଣାଯାଇଛି ଯେ କଂଗ୍ରେସ ଭୋଟରଙ୍କୁ ଟାର୍ଗେଟ କରାଯାଉଛି।
ରାହୁଲ ଗାନ୍ଧୀ କହିଛନ୍ତି ଯେ ଯେଉଁ ଲୋକଙ୍କ ନାମରେ ଭୋଟ ଡିଲିଟ ଆବେଦନ ଦାଖଲ କରାଯାଇଥିଲା ସେମାନଙ୍କର ଏ ବିଷୟରେ କୌଣସି ଧାରଣା ନାହିଁ। ସେହିପରି କେଉଁ ବ୍ୟକ୍ତିଙ୍କ ପାଖରେ OTP ଯାଇଛି ସେ ବିଷୟରେ କୌଣସି ସୂଚନା ନାହିଁ। ରାହୁଲ ଗାନ୍ଧୀ କହିଛନ୍ତି ଯେ ଭୋର ୪ଟାରେ ୩୬ ସେକେଣ୍ଡ ମଧ୍ୟରେ ଭୋଟ ଡିଲିଟ ପାଇଁ ଆବେଦନ ଦାଖଲ କରାଯାଇଥିଲା। BLOଙ୍କ ସମ୍ପର୍କୀୟଙ୍କ ନାମ ଡିଲିଟ ହେବା ପରେ ଏହି ଘଟଣା ସାମ୍ନାକୁ ଆସିଥିଲା। ରାହୁଲ ଗାନ୍ଧୀ ମଞ୍ଚ ଉପରେ ନାମ ଡିଲିଟ ହୋଇଥିବା କିଛି ଲୋକଙ୍କୁ ଡାକି ପ୍ରମାଣ କରିବାକୁ ଚାହିଁଥିଲେ। ଆଲନ୍ଦ ହେଉଛି କର୍ଣ୍ଣାଟକର ଏକ ନିର୍ବାଚନମଣ୍ଡଳୀ। ୨୦୨୩ ନିର୍ବାଚନରେ ଆଲନ୍ଦରେ ମୋଟ କେତେ ଭୋଟ୍ ଡିଲିଟ୍ କରାଯାଇଥିଲା ତାହା ସ୍ପଷ୍ଟ ନାହିଁ କିନ୍ତୁ ଏହା ୬,୦୧୮ ଅପେକ୍ଷା ବହୁତ ଅଧିକ ଯାହାକୁ ଡିଲିଟ୍ କରିବା ସମୟରେ ଧରାପଡ଼ିଥିଲେ। ଏଠାରେ ଜଣେ ବ୍ୟକ୍ତିଙ୍କର ଭୋଟ ଡିଲିଟ୍ କରିବା ସମୟରେ କିପରି ହେରଫେର ହୋଇଥିଲା ତାହା ମଧ୍ୟ ଜଣାପଡିଥିଲ ସେ ବିଷୟରେ ବିସ୍ତୃତ ଭାବରେ ବର୍ଣ୍ଣନା କରିଥିଲେ ରାହୁଲ ଗାନ୍ଧୀ।
ରାହୁଲ ଗାନ୍ଧୀ କହିଥିଲେ ଯେ ଜ୍ଞାନେଶ କୁମାର ଭୋଟ ଡିଲିଟ୍ କରୁଥିବା ଲୋକଙ୍କୁ ସୁରକ୍ଷା ଦେଉଛନ୍ତି। କର୍ଣ୍ଣାଟକ ସିଆଇଡି ନିର୍ବାଚନ କମିଶନଙ୍କୁ ୧୮ଟି ଚିଠି ଲେଖିଥିଲା କିନ୍ତୁ କୌଣସି ଉତ୍ତର ପାଇନଥିଲା। କଂଗ୍ରେସ ନେତା ଆହୁରି ମଧ୍ୟ କହିଛନ୍ତି ଯେ କର୍ଣ୍ଣାଟକ ସିଇସି ଦିଲ୍ଲୀକୁ ମଧ୍ୟ ଏକ ଚିଠି ପଠାଇଥିଲେ। ସେ ଦୃଢ଼ୋକ୍ତି ପ୍ରକାଶ କରିଥିଲେ ଯେ ନିର୍ବାଚନ କମିଶନ ଜାଣନ୍ତି ଯେ ଏହା ପଛରେ କିଏ ଅଛି। ରାହୁଲ ଗାନ୍ଧୀ କହିଥିଲେ ଯେ ମହାରାଷ୍ଟ୍ରର ରାଜୁରାରେ ୬,୮୫୦ ଭୋଟ ଡିଲିଟ୍ କରାଯାଇଥିଲା।
